អូតាវ៉ា៖ ទីភ្នាក់ងារសហប្រតិបត្តិការសន្តិសុខការពារជាតិ (DSCA) បានឱ្យដឹងថា ក្រសួងការបរទេសសហរដ្ឋអាមេរិក បានយល់ព្រមលើកិច្ចព្រមព្រៀងក្នុងទំហំទឹកប្រាក់ ៥០០លានដុល្លារ ចំពោះដំណើរការលក់មីស៊ីលប្រភេទ SM-2 Block IIIC និងឧបករណ៍ដែលពាក់ព័ន្ធទៅឱ្យប្រទេសកាណាដា។
ទីភ្នាក់ងារ DSCA បានគូសបញ្ជាក់ថា រដ្ឋាភិបាលកាណាដាបានស្នើសុំទិញមីស៊ីលប្រភេទ SM-2 Block IIIC ចំនួន១០០ និងប្រព័ន្ធបាញ់បញ្ឈរ MK-13 ចំនួន១០០ផងដែរ។ បន្ថែមពីនេះ នៅក្នុងសំណើក៏រួមបញ្ចូលទាំងសេវាកម្មបង្ហាត់បង្រៀន ព្រមទាំងការផ្គត់ផ្គង់ឧបករណ៍បច្ចេកទេសមួយចំនួនទៀតផង។
គួរជម្រាបថា SM-2 Block IIIC គឺជាប្រភេទមីស៊ីលបាញ់ពីលើទឹកទៅលើអាកាស ដែលត្រូវបានរចនាឡើងដើម្បីការពារនាវាចម្បាំង ប្រឆាំងនឹងមីស៊ីលពិឃាត ក៏ដូចជាយន្តហោះជាដើម។ ហើយកាណាដា គ្រោងនឹងដំឡើងមីស៊ីលទាំងនេះ នៅលើនាវាចម្បាំងរបស់ខ្លួនចំនួន ១៥គ្រឿង ដែលបានគ្រោងទុក៕
