ព្យុងយ៉ាង ៖ ប្រព័ន្ធផ្សព្វផ្សាយរដ្ឋ KCNA បានរាយការណ៍នៅថ្ងៃព្រហស្បតិ៍នេះថា មហាសន្និបាតប្រជាជនជាន់ខ្ពស់កូរ៉េខាងជើង បានដាក់បម្រាមហាមឃាត់ការជក់បារីនៅតាមទីសាធារណៈមួយចំនួន ក្នុងគោលដៅផ្តល់ឱ្យប្រជាជននូវ “បរិស្ថានរស់នៅប្រកបដោយអនាម័យ” ។
ប្រព័ន្ធផ្សព្វផ្សាយ KCNA បានដកស្រង់សម្តីសមាជិកសភាម្នាក់ ដែលបានលើកឡើងដូច្នេះថា៖ ច្បាប់ហាមឃាត់ការជក់បារីនេះ គឺធ្វើឡើងដើម្បីការពារអាយុជីវិត និងសុខភាពរបស់ប្រជាជនកូរ៉េខាងជើង តាមរយៈការរឹតបន្តឹងផ្នែកច្បាប់សង្គម ក៏ដូចជាការរិតត្បិតលើដំណើរការផលិតនិងការលក់បារី។
ប្រភពខាងលើបានឱ្យដឹងទៀតថា ច្បាប់ហាមឃាត់ការជក់បារី នឹងត្រូវធ្វើឡើងនៅទីកន្លែងផ្សេងៗរួមមាន មជ្ឈមណ្ឌលអប់រំនយោបាយនិងមនោគមវិជ្ជា រោងភាពយន្ត មន្ទីរពេទ្យ រួមទាំងទីកន្លែងផ្តល់សេវាសុខភាពសាធារណៈជាដើម។
គួរជម្រាបថា កូរ៉េខាងជើង គឺជាប្រទេសដែលមានអត្រានៃការជក់បារីខ្ពស់ ដោយគិតត្រឹមឆ្នាំ ២០១៣ ប្រទេសមួយនេះមានចំនួនអ្នកជក់បារី ដែលជាបុរសប្រមាណ ៤៣,៩%។ នេះបើយោងតាមអង្គការសុខភាពពិភពលោក៕
